Ginang utas sa selosong lover

MANILA, Philippines - Hindi na umabot ng buhay sa ospital ang isang 28-anyos na ginang matapos itong pagsasaksakin ng kanyang kinakasama dahil sa selos na naganap kamakalawa sa Parañaque City.

Ang nasawi ay kinila­lang si Jeanalyn Amores, 28, ng #39 Quirino Avenue, Lapid Market Compound, Barangay  Baclaran.

Ang suspek na tumakas ay kinilalang si Jonathan Dionisio, 40, vendor, at residente sa naturang lugar.

Batay sa ulat, bago nangyari ang krimen dakong alas-9:30 ng gabi sa loob ng bahay ng mag-live-in ay kinompronta ng suspek ang biktima tungkol sa nababalitaan nitong may nanliligaw dito.

Pinabulaanan ito ng  biktima na hindi pinaniniwalaan ng suspek nauwi sa mainitang pagtatalo hanggang sa kumuha ng patalim ang huli at walang habas na pinagsasaksak ang una sa iba’t ibang bahagi ng katawan.