Metro Manila Vice Mayors suportado si Tolentino sa pagka-Senador
MANILA, Philippines - Suportado ng Metro Manila Vice Mayors ang pagtakbo bilang senador ni dating MMDA Chairman Francis Tolentino sa 2016.
Sa isang resolusyon na pirmado ng 17 vice mayors ng Metro Manila ay binanggit nila kung paano nagpakita ng liderato at commitment sa paglilingkod sa bayan sa pamamagitan ng mga programa na nagpataas ng kalidad ng pamumuhay sa Kamaynilaan si Tolentino.
Kabilang dito ang pagbuhay sa Pasig River Ferry system,pagpapatupad ng single traffic ticketing system at paglalagay ng Southwest Integrated Bus Terminal.
Binanggit din ng konseho ang pagsasagawa ng MMDA ng sabayang #MMShakeDrill noong July 30 na nakakalap ng 6.5 milyong kalahok at 2.1-billion impressions o views sa social media.
“Di matatawaran ang pinakitang kasipagan ni Chairman Tolentino sa limang taon niya sa MMDA. ’Di naging mahirap para sa amin na humingi ng tulong dahil alam naming 24/7 handa siya at ang MMDA na rumesponde,” wika ni Las Piñas Vice Mayor Luis Bustamante.
Masaya namang tinanggap ni Tolentino ang endorsement at pinasalamatan ang vice mayors at mayors sa kanilang suporta at kooperasyon.
Ang resolution ay pirmado nina vice mayors Macario Asistio III (Caloocan), Luis Bustamante (Las Piñas), Jose Fabian Cadiz (Marikina), Leonardo Magpantay (Makati),Jeannie Sandoval (Malabon), Edward Bartolome (Mandaluyong), Francisco Domagoso (Manila),Artemio Simundac (Muntinlupa), Clint Nicolas Geronimo (Navotas), Iyo Christian Bernardo (Pasig), Marlon Pesebre (Pasay), Gerald German (Pateros), Ma. Josefina Alimurung (Quezon City), Franciso Javier Zamora (San Juan), Jose Enrico Golez (Parañaque), Ricardo Cruz (Taguig) at Eric Martines (Valenzuela).
- Latest
