Bading pinatay ng nobyo
MANILA, Philippines – Pinagbabaril at pinagsasaksak ang isang bading ng dating nobyo sa loob ng kuwarto kamakalawa ng gabi sa Quezon City.
Ang biktima na namatay noon din dahil sa mga tama ng bala at saksak sa katawan ay kinilala sa pangalang ‘Papa John’, nasa pagitan ng 30-35 anyos, residente sa no. 44 Dupax St., Brgy. Old Balara sa lungsod.
Ang dalawang suspek ay dating nobyo ng biktima na nasa edad 18 at isang kasama.
Bago ang krimen, dakong alas-11:30 ng gabi sa ikalimang palapag ng tinutuluyan ng biktima ay narinig ng magkapatid na Rachelle at Rica Deblois, mga anak ng kasera ng biktima ang putok ng baril at kasunod ay yabag ng paa na tila nagmamadali.
Nang sumilip ang dalawa sa bintana ay nakita nila ang nobyo ng biktima na nagmamadaling bumababa ng hagdan.
Nang makalayo ang suspek nagpasya ang magkapatid na silipin ang kuwarto ng biktima at doon nakita ang duguang katawan nito.
Ang biktima ay nagtamo ng mga tama ng bala sa kaliwang dibdib, leeg, at magkabilang braso at dalawang saksak sa dibdib.
Lumalabas na dakong alas-8:00 ng gabi ay nakita pa ang suspek at biktima na may hawak na alak at pumasok sa loob ng kuwarto.
- Latest
