Ex-LTO Chief Torres sa Hacienda Luisita, binubusisi na ng DAR

MANILA, Philippines - Binubusisi na ng pamunuan ng Department  of Agrarian Reform (DAR) ang kontrobersiyal na ulat kaugnay sa sinasabing  pag-upa  ng lupain ni dating LTO Chief Virginia Torres sa Hacienda Luisita.

Ayon kay DAR Asst. Secretary  Justin Vincent La Chica, mali at ipinagbabawal ng ahensiya sa mga beneficiaries ng Hacienda Luisita na ipagamit o paupahan sa iba  ang  mga lupaing ibi­nigay sa kanila sa ilalim ng Comprehensive Agra­rian Reform Program.

Sinabi ni La Chica, kung sakaling  mapatunayan sa imbestigasyon na pinagamit kay Torres ang nasabing lupain, agad silang aapela para  kanselahin sa beneficiaries ang lupang ibinigay sa kanila ng DAR.

Sa ngayon ay hindi pa nila alam kung may lupa ngang  inuupahan si Torres sa Hacienda Luisita at malalaman lamang nila ito kapag panahon na ng pag-aani ng tubo dahil sa panahong iyon makikita nila kung sino ang mga namuhunan doon.

Samantala, sinabi ni Sugar Regulatory Admi­nistration administrator Regina Martin, sa kanilang pagkakaalam umaabot sa 120 hectares ang sinasabing inuupahan ni Torres sa Hacienda Luisita.

Pero nagpapatuloy din umano ang kanilang imbestigasyon kung tunay ngang  inuupahan ito ni Torres o pumasok ito sa isang joint venture.

Kinumpirma naman ni Martin na may permit si Torres para makipag trade ng domestic sugar pero wala silang pinapayagan na mag -angkat ng asukal.