Container van ng DOLE sinunog ng NPA rebels
MANILA, Philippines - Hinarang ng nasa 15 miyembro ng New People’s Army (NPA) ang container van ng DOLE Philippines sa kahabaan ng national highway ng Brgy. Liatimco, Lianga, Surigao del Sur at saka sinunog kamakalawa.
Sa ulat na nakarating kay Supt. Martin Gamba, Spokesman ng CARAGA Police, dakong alas-3:55 ng hapon nang harangin ng mga rebelde ang container van (PUU 343) na naglalaman ng mga prutas na saging na bumiyahe galing sa Brgy. Dayoan, Tago, Surigao del Sur patungong Panabo City, Davao del Norte.
Wala namang nagawa ang driver at mga pahinante ng behikulo matapos na tutukan ng baril at puwersahang pababain sa behikulo ng mga armadong rebelde.
Binuhusan ng gasolina at sinilaban ng mga rebelde ang nasabing container van bago ang mga ito mabilis na nagsitakas patungo sa direksyon ng kagubatan.
Hinala na pangingikil ng revolutionary tax ang motibo ng panununog.
- Latest
