Pulis, 14 pa tiklo sa drug dens raid

MANILA, Philippines – Naaresto ng mga operatiba ng PNP-Anti-Illegal Drugs Special Operations Task Force ang 15 katao kabilang ang isang pulis sa isinagawang serye ng pagsalakay sa  12 drug dens sa Brgy. West Crame, San Juan City kahapon ng umaga.

Ang inarestong parak ay kinilalang si PO2 Ronaldo Baltazar, nakatalaga sa Headquarters Support Service ng PNP.

Ayon kay PNP-AIDSOTF Chief P/Sr. Supt. Antonio Gardiola  ang serye ng raid ay bunga ng isang buwang ‘case build-up operation’ at epektibong pakikiisa ng komunidad sa PNP upang malansag  ang operasyon ng droga sa mga barangay.

Sinabi nito na target ng PNP-AIDSOTF  na malipol ang operasyon ng illegal na droga sa mga barangay sa iba’t ibang lugar sa bansa.

Ang mga suspek ay nahaharap sa kasong paglabag sa Republic Act 9165 o ang Anti-Illegal Drugs Act.