Trak nahulog sa bangin: 4 patay
MANILA, Philippines – Nasawi ang apat katao habang dalawa ang nasugatan nang aksidenteng mahulog sa malalim na bangin ang isang truck kamakalawa sa isang liblib na lugar sa Brgy. Salacafe, T’boli, South Cotabato.
Ang mga nasawi sa lugar ng pinangyarihan ay kinilalang sina Darryle Gaje; Marlo Gal; Rene Boy Unggay at Joemar Lambong. Habang ginagamot sa pagamutan sina Leo Caluña at Mark Blasa.
Batay sa ulat, dakong alas-2:00 ng hapon nang matanggap ni Chief Inspector Aldrin Gonzales, Spokesman ng Police Regional Office (PRO) 11, ang sakuna ay nangyari bandang alas-7:05 ng umaga sa kahabaan ng Sitio Kinalom, Brgy. Salacafe, Tboli, South Cotabato.
Lumalabas sa imbestigasyon, ay mabilis na bumabagtas sa lugar ang Izusu Elf truck (GGS -183) na minamaneho ni Gaje lulan ang iba pang mga biktima nang mag-overshoot ang trak sa matarik na bahagi ng highway.
Tuluy-tuloy na bumulusok sa 100 metrong lalim na bangin na kung saan ang mga nasawi ay naipit ng truck at tumama ang mga katawan sa batuhan at kahuyan na siyang agarang kumitil sa buhay ng mga ito.
- Latest
