Ambush: 4 barangay officials patay
MANILA, Philippines – Patay ang apat na opisyal ng barangay habang matapos na sila ay paulanan ng bala sa naganap na ambush sa Tangal Bridge sa kahabaan ng highway ng Mother Barangay Bagua, Cotabato City kamakalawa ng hapon.
Ang mga nasawi ay kinilalang sina Brgy. Bagua Kagawad Misuari Karim at mga tanod na sina Marco Abo, Melobi Wahab at Mantex Kalion na pawang nagtamo ng mga tama ng bala sa iba’t-ibang bahagi ng katawan.
Lumalabas sa imbestigasyon na bago nangyari ang pamamaril sa mga biktima bandang alas- 5:00 ng hapon ay kasalukuyang nagpapatrulya sa lugar ang mga ito lulan ng multicab nang pagbabarilin ng mga armadong kalalakihan ang kanilang sinasakyan.
Narekober sa lugar ang mga basyo ng bala ng M16 rifle, AK 47 rifle, cal. 45 pistol at cal 9 MM pistol.
Itinuro naman ng mga testigo sa mga otoridad na ang grupo umano ni Brgy. Kagawad Bimbo Ayunan ang nasa likod ng pananambang sa mga biktima.
- Latest
