Rebelde todas, 4 sugatan sa bakbakan
MANILA, Philippines - Nasawi ang isang miyembro ng mga rebeldeng New People’s Army (NPA) habang apat nitong kasama ang grabeng nasugatan nang makasagupa ang tropa ng mga sundalo sa Brgy. Aposkahoy, Claveria, Misamis Oriental kamakalawa.
Narekober ang bangkay ng isang hindi pa nakilalang rebelde sa pagpapatuloy ng clearing operation ng mga sundalo kahapon ng umaga sa lugar ng engkuwentro.
Ayon kay Captain Alberto Caber, Chief ng AFP-Eastern Mindanao Command (AFP-Eastmincom) bandang alas-10:00 ng umaga ay nagsasagawa ng security patrol ang Army’s 58th Infantry Battalion (IB), 4th Infantry Division (ID) nang masagupa ang nasa 30 rebelde na nagbunsod ng bakbakan.
Ang mga nasabing rebelde ay pinamumunuan ng isang alyas Ka Budo na sangkot sa extortion sa mga negosyante at maging sa mga pangkaraniwang residente sa lugar.
Tumagal ng isang oras ang palitan ng putok na ikinasawi ng isang rebelde habang apat pa sa malubhang nasugatan ang binitbit ng mga nagsitakas na kalaban.
- Latest
