Matapos na inendorso si Mar... Grace nagpasalamat kay P-Noy
MANILA, Philippines - Kahit pa ang inendorsong presidential candidate ni Pangulong Noynoy Aquino si Interior and Local Government Secretary Mar Roxas para sa presidential election sa susunod na taon ay nagpasalamat pa rin si Senator Grace Poe.
Ayon kay Poe, nagpapasalamat pa rin siya sa Pangulo dahil ibinilang siya sa mga taong sa tingin niya ay puwedeng magpatuloy sa “Daang Matuwid”.
Sinabi pa ni Poe na patuloy pa rin niyang tatahakin ang daang matuwid dahil mas magiging makabuluhan ang nasabing adhikain kung marami ang susunod.
Idinagdag ni Poe na kinikilala niya ang pagnanais ni Roxas na makapagsilbi sa bayan bilang presidente at kaisa siya sa hangarin na maipagpatuloy ang mga nasimulan na ni Pangulong Aquino.
Isa si Poe sa inaasahang tatakbong pangulo sa 2016 bilang independent candidate kahit pa hindi nakuha ang endorsement ng Pangulo.
Samantala, matapos tanggapin ang hamon bilang standard bearer ng Liberal Party (LP) ay nakatakda na itong magbitiw sa puwesto bilang Kalihim ng DILG dahil sa delicadeza.
Una nang sinabi ni Roxas na kung sakali man at magdesisyon siyang tumakbo sa presidential elections o kahit ano pa mang mataas na posisyon sa gobyerno ay agad siyang magbibitiw sa posisyon sa gabinete.
- Latest
