2 sibilyan napatay sa ‘Mamasapano clash’
MANILA, Philippines - Binawian na ng buhay ang dalawa sa anim na sibilyan na tinamaan ng bala nang maipit sa bakbakan sa pagitan ng mga miyembro ng Special Action Force (SAF) at ng Moro Islamic Liberation Front (MILF) at Bangsamoro Islamic Freedom Fighters (BIFF) sa Mamasapano, Maguindanao noong nakaraang linggo.
Sinabi ni Myrna Angot, Officer in Charge ng Office of Civil Defense (OCD-ARMM), binawian na ng buhay ang mga biktimang sina Sara Panangulon, 5 at Badrudin Langalan, 22.
Patuloy namang nilalapatan ng lunas sa pagamutan ang mga sugatang sina Tot Panangulon, misis nitong si Samra Panangulon; Saad Minidal, 15, Saed Sangkutin, 19.
Sa pahayag ni Angot, nasa 1,324 pamilya o kabuuang 6, 620 katao mula sa anim na barangay ang naapektuhan ng bakbakan sa pagitan ng SAF commandos, Bangsamoro Islamic Freedom Fighters (BIFF) at MILF rebels sa Sitio Inogog, Brgy. Tukanalipao, Mamasapano, Maguindanao noong Enero 25.
Sa pinakahuling ulat ay nagsimula ng magbalikan sa kanilang mga tahanan ang mga apektadong pamilya. - Joy Cantos-
- Latest
