Amerikano patay sa love triangle

MANILA, Philippines - Pinagbabaril hanggang sa mapatay ang isang American citizen ng dalawang di kilalang suspek sakay ng motorsiklo sa  Barangay Sum-ag, Bacolod City, Negros Occidental kamakalawa ng gabi.

Ang nasawing biktima  na si Bernard Jereza, 46, ay idineklarang dead-on-arrival sa Bacolod Adventist Medical Center dahil sa tinamong apat na tama ng tama ng bala ng cal. 45 pistol. 

Sa imbestigasyon, dakong alas-7 ng gabi ng maganap ang insidente sa nasabing lugar kung saan kadarating lang ng biktima, live-in partner nito at anak sa bahay ng tiyuhin. Ngunit bigla na lang umanong dumating ang mga suspek at biglang pinagbabaril ang biktima.

 Narekober naman sa pinangyarihan ng krimen ang mga basyo ng bala. Pinaniniwalaang love triangle ang motibo ng krimen habang patuloy pa ang imbestigasyon sa kaso.