Abogado, 2 pa tugis sa BuCor guard slay

MANILA, Philippines - Tinutugis ng mga otoridad ang  isang  abogado at dalawang kasamahan nito  na sinasabing sangkot sa pagpatay sa isang  jail officer ng  Bureau of Corrections (BUCOR) na natagpuang patay sa loob ng inuupa­hang condominium unit ng abogado noong Sabado ng madaling araw sa Malate, Maynila.

Ikinokonsiderang  person of interest  si Atty. Vladimir Bugaring, 36.  na siyang may-ari ng  Unit No. 2503 ng Burgundy Condominium sa No.  2442 Taft Ave., sa Malate, Maynila na  kinatagpuan ng bangkay ni Jail Officer 1  Tristan Cultivo, ng 155 Posadas Village, Sucat, Muntinlupa.

 Bukod kay Bugaring ay pinaghahanap din ang tiyuhin nito na si  alyas “Bob” at isa pang hindi nakikila­lang lalaki.

Si Bugaring kasama ang dalawa pa ay nakita sa CCTV  ng nasabing condominium na nagmamada­ling umalis dakong alas-11:56 ng gabi.

Maging ang opisina ni Bugaring sa Amparo Building sa may España ay pinuntahan ng pulisya, subalit wala ito doon.

Sa isinagawang im­bestigasyon sa crime scene ay natagpuan na nakapatong sa katawan ng biktima ang kanyang service firearms na hinihinalang ginamit sa pagpatay dito.

Nakita rin ang  pagkasira ng lababo na indikasyon na nagpambuno ang  biktima at mga suspek bago binaril  ang biktima.

Hindi rin inaasahan ng pamilya ng biktima na si Bugaring  ay isa sa mga suspek dahil na­ging professor pa umano ito ng biktima si Bugaring sa FEU noong nag-aaral pa sa kolehiyo at naging tagahatid pa ng mga dokumento sa abogado.

Batay sa pahayag ng kalapit kuwarto na bandang alas-11:30 ng gabi nang makarinig ng dalawang putok ng baril at sinasabing bandang alas-10:56 ng gabi nang makita ang biktima na dumating sa condo para   maghatid ng mga dokumento kay Bugaring.

Nabatid din na pitong taon nang magkaibigan ang biktima at Bugaring na  natulungan ang una na makapasok bilang jailguard.