2 kidnaper dedbol, 2 tiklo

MANILA, Philippines - Dalawang umano’y kidnaper ang napatay habang dalawang kasama nito ang nadakip matapos na manlaban sa mga otoridad  sa naganap na shootout kamakalawa sa Brgy. San Nicolas, Concepcion, Tarlac.

Kinilala ng pulisya ang mga nasawing suspek na sina Marcelo Garcia, 42 at Jet Rejano, 38, habang arestado naman sina Kagawad Edgardo Laxamana ng Brgy. Telablanca at Bartolome Puno, 59, ng Brgy. San Nicolas; pa­wang ng ba­yang nabanggit.

Ayon sa pulisya ang nasabing lugar ay isinailalim sa mahigpit na pagbabantay dahil sa bigong pagdukot sa anak ng negosyanteng Chinese na si Yan Xiao Qun noong Disyembre 1, 2014.

Bago ito ay nakatanggap ng impormasyon ang pulisya na mayroong armadong kalalakihan sa labas ng Mega Yan Farm na pag-aari ni Yan Xian Qun sa Brgy. San Nicolas, Concepcion bunsod para magresponde sa lugar ang mga elemento ng pulisya.

Kung saan isang kulay maroon na Mitsubishi Montero ( PQW-573) ang nadatnan ng mga awtoridad na nakaparada sa lugar  at mamakyaw lang umano ng pakwan ang mga sakay nito, ngunit napansin ng pulisya na may itinatagong baril ang mga ito. Sa halip umano na sumuko ang mga suspek nang sitahin ay lumaban ang mga ito sa mga otoridad.

Nasamsam ng mga awtoridad sa mga suspek ang isang .357 Magnum, anim na basyo ng bala mula kay Puno habang isa namang Norinco ca­liber 45 pistol magazine at saka mga bala mula naman kay  Laxamana.