Hindi niyaya sa inuman nagwala

MANILA, Philippines – Nagwala at nangha­bol ng saksak ang isang 47-anyos na lalaki matapos na hindi niyaya sa inuman ng kanyang mga kabarkada kahapon sa Navotas City.

Ang suspek na inaresto ng mga magkakaibigan na nag-iinuman na kanyang nilusob ng saksak ay kinila­lang si Mario Japua, ng Lot 34,  Dagat-Dagatan,  Barangay North Bay Boulevard South (NBBS).

Sugatan at isinugod naman sa pagamutan ang biktimang si Ronnie Dela Cruz, 33, ng Block 34, Lot 1-C, Phase 2, Area 2 na nagtamo ng saksak sa kaliwang balikat.

Sa ulat, bago nangyari ang insidente dakong  ala-1:15 ng madaling araw ay masayang nag-iinuman si Dela Cruz nang bigla na lamang dumating ang suspek na armado ng balisong at walang sabi-sabi ginulo ang inuman at nanghabol ng saksak at tinamaan  sa kaliwang balikat ang biktima.

Hinabol ng mga kainuman ni Dela Cruz ang suspek at nang maaresto ay kanila itong ibinigay sa Police Community Precinct (PCP) 3.

Malaki ang hinala ng pulisya na sumama ang loob ng suspek matapos na siya ay hindi imbitahan sa inuman gayung kabarkada niya ang biktima at kasama nito.