Roxas pinagbakasyon na si Purisima

MANILA, Philippines - Uupo na bilang Officer in Charge  ng Phi­lippine National Police (PNP) si Deputy Director General Leonardo Espina matapos isilbi ni Interior and Local Government Secretary Mar Roxas ang 6 buwang ‘suspension order’ na ipinataw ng Office of the Ombudsman laban  kay PNP Chief Director General Alan Purisima.

Ayon kay Roxas pinalagan ng kampo ni Purisima ang nasabing suspension order sa pagsasabing wala  sa hurisdiksyon ng DILG ang pagsisilbi ng kautusan dahil nasa ilalim ng kapangyarihan ng NAPOLCOM ang PNP.

Sinabi ni Atty. Kris­toffer James Purisima, kamag-anak at legal counsel ng Chief PNP na maituturing na illegal ang pagsisilbi ng nasabing kautusan.

Sinabi naman ni Ro­xas na taktika lamang ng abogado ni Purisima  ang hindi pagkilala sa DILG sa layuning harangin ang suspension order.

Sa kasalukuyan ay nasa Samar pa rin si Ro­xas para sa isinasagawang assessment sa pinsala ng bagyong Ruby at disaster response operations sa mga naging biktima ng bagyong Ruby.

Magugunita na si Purisima ay pinatawan ng 6 buwang suspensiyon ng Ombudsman kaugnay ng maano­malyang P100M kontrata sa Werfast Documentary Agency na nagde-deliver ng mga lisensya ng baril.