Kotse nag-overtake, nasapol ng bus

MANILA, Philippines - Patay ang driver ng isang kotse nang ito ay masalpok ng isang pampasaherong bus matapos na umano’y mag-overtake sa Aguinaldo Highway, Brgy. Sampaloc 2, Dasmariñas City, Cavite, kamakalawa.

Ang nasawi ay kinilalang sina Rizaldo Montoya, 53, ng Sikap Ville Brgy. Sabutan, Silang, Cavite.

Ang suspek na inaresto ng pulisya ay kinilalang si Arnulfo G. Sidigo, 39, bus driver, ng Blk.7, Lot 4, Yellowbell St., Perpetual Ville 7, Brgy. Mambog Bacoor, Cavite.

Batay sa ulat, dakong alas-7:00 ng gabi ay binabagtas ng pampasaherong bus (UVE-717) na minamaneho ni Sidigo patungo ng north direction nang bigla na lamang sumulpot ang Toyota Corolla (TJS-880) ng biktima na patungong south direction na kinain ang linya ng bus.

Kung kaya’t hindi na naiwasan ng bus ang kotse at  nasalpok ito.

Sa lakas ng pagkasalpok ay paikot at bumaliktad ang kotse ng biktima na naipit sa loob na naging sanhi ng kanyang kamatayan at maraming pasahero ng bus ang nasugatan.

Ang driver ng bus ay kinasuhan ng reckless imprudence resulting to homicide and multiple physical injuries and damage to property.