Pangulo ng homeowners association todas sa tandem
MANILA, Philippines - Isang lalaki na pangulo ng homeowners association ang pinagbabaril ng isa sa dalawang suspek na sakay ng motorsiklo kamakalawa sa Caloocan City.
Ang biktima na namatay noon din ay kinilalang si Ereneo Constanti, 55, residente ng Doña Ana St., Brgy. 175, ng naturang lungsod.
Batay sa ulat, pasado alas-11:00 ng umaga nang huminto sa harapan ng vulcanizing shop na pag-aari ng biktima ang dalawang lalaking sakay ng isang motorsiklo na unang inakala na magpapaayos ng gulong.
Bigla na lamang bumunot ng kalibre .45 baril ang nakaangkas at pinaputukan ang biktima saka mabilis na tumakas.
Ang biktima na pangulo ng Barangay 175 Homeowners Association ay pangulo din ng Samahan ng mga Bikolano sa kanilang lugar.
Patuloy ang imbestigasyon kung may kinalaman ang pagpatay sa biktima sa kanyang posisyon sa kanilang lugar.
- Latest
