Kawani ng KTV sinalubong ng kamatayan
MANILA, Philippines - Sinalubong ng kamatayan ang isang 49-anyos na kawani ng isang KTV bar nang barilin ito sa ulo habang papasok sa kanyang kotse ng isang lalaki kahapon ng madaling-araw sa Malate, Maynila.
Ang biktima na idineklarang dead-on- arrival sa Ospital ng Maynila ay kinilalang si Frank La Rosa, may-asawa, nagtatrabaho sa Orange 5 KTV Bar, Mabini St., panulukan ng Sinagoga St., Malate.
Inilarawan ng mga saksi ang suspek na lulan ng motorsiklong kulay pula na “XRM” na hindi naplakahan, nakasuot ng helmet at jacket na puti at may taas na 5’6” hanggang 5’7”.
Batay sa ulat, dakong alas-4:00 ng madaling araw ay pasakay na ang biktima sa kaniyang Honda Civic (TRH-498) na nakaparada sa harap ng pinapasukang bar nang lapitan ito ng suspek at walang kaabog-abog na binaril sa ulo at pagkatapos ay tumakas.
- Latest
