Jollibee manager inutas ng pulis
MANILA, Philippines - Pinuntirya ng isang pulis ang ulo ng isang 24-anyos na manager ng Jollibee nang sila ay nagkaroon ng mainitang pagtatalo kamakalawa sa Pasig City.
Ang biktima na namatay noon din dahil sa tama ng isang bala ng M-16 armalite sa ulo na tumagos sa panga ay kinilalang si Irvin Perez, marketing manager ng Jollibee sa Antipolo at naninirahan sa Galaxy St., Cielo Homes, Bgy. San Isidro, Taytay, Rizal.
Ang suspek na sumuko ay kinilalang si PO2 Mark Dorado, 29, nakatalaga sa Rizal Provincial Police, Hilltop, Antipolo City at residente ng Block 8, Lot 12, Saint Mary St., Metro Villa Subdivision, Barangay Manggahan, ng lungsod.
Sa imbestigasyon, bago nangyari ang krimen dakong ala-1:30 ng madaling-araw sa mismong bahay ng suspek na pulis ay nagtungo doon ang biktima dahil sa imbitasyon ng isang Renz Michael Coloma para dumalo sa isang Bible sharing.
Nabatid na si Coloma ay kasambahay ni Dorado dahil pinsan nito ang live-in partner ng pulis.
Sa hindi pa mabatid na kadahilanan ay nagkaroon ang dalawa ng hindi pagkakaunawaan na nauwi sa pagtatalo hanggang kinuha ng suspek ang kanyang armalite at binaril nang malapitan sa ulo ang biktima.
- Latest
