Janet at Gigi magkakosa na

MANILA, Philippines - Mula sa kinasasadlakang selda sa Fort Sto. Domingo sa Laguna ay nagpalabas ng utos kahapon ang Sandiganbayan 3rd Division na ilipat na si Janet Lim Napoles sa female dorm sa Camp Bagong Diwa sa Taguig City.

Kaya’t makakasama na ni Napoles si Atty. Gigi Reyes, dating chief of staff ni Senador Juan Ponce Enrile na kapwa akusado sa plunder at graft kaugnay ng pork barrel scam.

Ang kautusan ng graft court  kay Napoles ay bilang tugon sa request ng prosekusyon mula sa tanggapan ng Ombudsman na ang isang indibidwal na may kasong plunder ay nararapat na makulong sa isang regular na piitan.

Ibinasura ng graft court ang kahilingan ng kampo ni Napoles na huwag ilipat sa isang regular na kulungan dahilan sa ito umano ay banta sa kanyang buhay.

Niliwanag ng prosekusyon na ang isang indibidwal na may kasong kriminal ay dapat na nasa kustodya ng BJMP at hindi ng PNP.

Nang matanggap ang commitment order ng Sandiganbayan ay agad namang tinupad ng mga BJMP personnel  ang naturang kautusan laban kay Napoles.

Si Napoles ay nakulong sa Fort Sto. Domingo sa Laguna mula  September 2013 makaraang sumuko sa Malakanyang noong August 2013 makaraang makasuhan ng serious illegal detention ng pangunahing pork barrel scam whistleblower na si  Benhur Luy.