1 todas, 1 pa kritikal sa bus

MANILA, Philippines - Todas ang isang hindi pa nakikilalang lalaki makaraang mabundol ng isang rumaragasang bus sa may Caloocan City habang isa pang lalaki ang kritikal naman nang mabangga rin ng isa pang bus sa may Valenzuela City kahapon ng umaga.

 Inilarawan ang nasawing biktima na nasa edad 30, katamtaman ang pangangatawan naka-itim na t-shirt at maong na short.  Hindi naman naplakahan o nakita ang pangalan ng nakabundol na bus na nakita lamang ng isang saksi na kulay berde ang likuran at may ads ng Silver Swan soy sauce.

Ayon kay Senior Insp. Pablo Temenia, hepe ng Traffic Division ng Caloocan City Police na dakong alas-2:45 ng madaling araw, naglalakad ang biktima sa tapat ng Caltex Gasoline Station sa Urbano St., EDSA ng lungsod nang mahagip ng bus, makaladkad at magulungan na naging dahilan ng agad na kamatayan habang hindi na huminto ang hindi pa kilalang driver.

Samantala, inoobserbahan naman sa may Fatima Medical Center ang 18-anyos na estudyante na si Miguel Angelo Enriquez, ng Bernadette Street, Karuhatan, Valenzuela.

Naglalakad sa gilid ng MacArthur Highway ang biktima nang masagi at makaladkad ng bus ng King Sam.  Sumuko naman sa pulisya ang driver ng bus na si Santiago Cruz, residente ng Pulilan, Bulacan at nahaharap ngayon sa kasong reckless imprudence resulting to serious physical injuries.