Biyuda kinatay ng kapitbahay

MANILA, Philippines - Tinadtad nang saksak ang isang biyuda ng kanyang kapitbahay na nagsagawa ng pagnanakaw sa kanyang bahay kamakalawa ng gabi sa Zamboanga City.

Kinilala ang nasawing si Isidra Rudy, nasa hustong gulang na natagpuan ng isa nitong kaanak sa loob ng banyo na nakatali ng packing tape at tadtad ng mga saksak partikular na sa dibdib.

Sa ulat, bandang alas-10:30 ng gabi  nang maganap ang krimen sa bahay ng biyuda sa Dionio Compound, Brgy.Tumaga ng lungsod.

Ang suspek ay kinilalang si Niño Fernando, nasa hustong gulang, may-asawa at kapitbahay ng biktima.

Nabatid na nawawala ang hindi pa madeterminang halaga ng pera at alahas mula sa bahay ng ginang.

Kasalukuyan ng pinaghahanap ng mga otoridad si Fernando na siyang nakitang tumatalilis galing sa bahay ng biktima ilang oras bago nadiskubre ang krimen.

Una rito ay nagkaroon ng argumento ang biktima at ang suspek sa bisinidad ng Brgy. Hall ng Brgy. Sta Maria sa lungsod na nasaksihan pa ng ilang residente sa lugar.