2 kelot nahulog mula ika-7 at ika-10 palapag ng gusali

MANILA, Philippines - Dalawang lalaki ang kapwa nasawi sa magkahiwalay na insidente nang pagkahulog sa gusali sa Makati City at Maynila.

Ang 27-anyos na si Christian Sanchez, empleyado ay nahulog mula ika-7 palapag ng  PBCom Tower na nasa panulukan ng Ayala Avenue at Rufino St., Makati City.

Sa ulat, dakong alas-7:15 umaga nang bumagsak ang biktima sa ibaba ng naturang gusali at agad na dinala sa Makati Medical Center, subalit hindi na ito umabot ng buhay dahil sa tinamong pinsala sa pagbagsak.

Nasawi rin ang 43-anyos na pintor na si Jimmy Balwit ng Purok 6, Hernandez St., Catmon, Malabon City matapos mahulog mula sa ika-10 palapag ng ginagawang gusali, sa Binondo, Maynila, kamakalawa ng hapon.

Sa inisyal na ulat, dakong alas-4:00 ng hapon nang maganap ang insidente sa 10th floor ng HS Commercial Tower sa 854-856 Alvarado St., Binondo, Maynila nang dumaan ang biktima sa nylon rope na aksidenteng nakabitaw ito.