Bata pisak, 20 sugatan sa relief operation ni P-Noy

MANILA, Philippines - Nasawi ang isang 4-anyos na batang babae habang nasa 20 katao ang nasugatan matapos na mauwi sa stampede ang 4P’s relief  assistance ni Pangulong Benigno Aquino III na ipinamamahagi ng mga lokal na opisyal sa mga biktima ng lindol kahapon sa  Pinamungahan, Cebu.

Kinilala lamang ang bata sa pangalan nitong Shaiza Mia na nadaganan sa stampede matapos isama ng mga magulang nito sa mahabang pila sa 4Ps.

Batay sa ulat, ilang oras matapos ang 7.2 magnitude ng lindol na naitala dakong alas-8:12 ng umaga ay agad namahagi ng Pantawid Pamil­yang Pilipino Program (4Ps) sa mga apektadong lugar sa Cebu.

Ang 4Ps na programa ni Pangulong Benigno Aquino III ay pinanga­ngasiwaan ni Department of Social Welfare and Development (DSWD) Secretary Dinky Soliman.

Isinugod naman sa pa­gamutan ang mga nasu­gatang biktima para malapatan ng lunas.