Mister pinagbabaril, todas

MANILA, Philippines - Tigok ang isang mister makaraang pagbabarilin sa ibat-ibang parte ng kanyang katawan sa loob ng isang tahanan sa Quezon City, kahapon ng umaga .

Kinilala ang biktima na si Anthony Palma, 54, may-asawa, residente ng #34 Don Carlos St., Don Antonio Heights, Brgy. Holy Spirit, sa lungsod.

Ayon kay PO2 Alvin Quisumbing, may hawak sa kaso, naganap ang pamamaril dakong alas-5:00 ng umaga sa loob ng  #21 Don Carlos St., sa nasabing lugar.

Sinabi ng mga residente, nakarinig sila ng sunod-sunod na putok ng baril sa loob ng tahanan at nang tingnan nila ang pinagmulan ng putok ay tumambad sa kanila ang nakahandusay na biktima kaya agad nilang ini-report sa himpilan ng pulisya.

Narekober sa lugar ang 11 na piraso ng basyo ng cal.9mm pistol at isang plastik na sachet na nagla­laman ng white crystalline substance na pinaghihinalaang “shabu”. Posibleng onsehan sa droga ang motibo ng krimen.