VP ng bangko, lady trader nasagip… kidnaper tiklo sa pay-off

MANILA, Philippines - Isang lalaki na executive vice president ng isang bangko at isang babaeng negosyan­te ang matagumpay na nailigtas ng mga otoridad habang arestado ang isa sa mga kidnaper sa naganap na pay-off sa parking lot ng isang mall sa Cabana­tuan City, Nueva Ecija.

Ang mga nasagip na biktima ay kinilalang sina Aurelio Villaflor, 62, Exe­cuvite Vice President ng GM Bank, isang rural bank sa lalawigan at ang kasama nitong negosyan­teng si Evangeline Urgente, 37-anyos.

Arestado naman ang isa sa mga kidnaper na si John Viterbo del Rosario habang nasa aktong tinatanggap ang P400,000 ransom sa isang pulis na nagpanggap na kamag-anak ng dalawang biktima.

Ayon kay PNP-Cri­minal Investigation and Detection Group (PNP-CIDG) Chief P/Director Francisco Uyami Jr., dakong alas-4:00 ng hapon nang isagawa ang payoff matapos na makipagkoordinasyon ang pamilya ng mga biktima sa mga operatiba ng pulisya  sa napagkasunduang par­king lot ng Mega Center Mall ng lungsod.

Agad namang sinunggaban ng nakaposteng mga operatiba ng Nueva Ecija Criminal Investigation and Detection Team (CIDT) at Nueva Ecija Pro­vincial Police Office sa pamumuno ni Chief Inspector Mario Sagcal ang suspek na nagresulta sa matagumpay na pagka­kaligtas sa dalawang biktima.

Sa ulat, ang dalawang biktima ay dinukot ng 7 armadong kalalakihan sa Brgy. Dinarayat, Talavera, Nueva Ecija bandang alas-7:55 ng gabi.

Una nang humingi ang mga kidnappers ng P3.5 M ransom hanggang sa naibaba ito sa P400,000 kung saan itinakda ang payoff sa lugar.