Bus bawal na sa Maynila

MANILA, Philippines -Sinimulan na kahapon ng lungsod ng Maynila ang pagsisimula ng implementasyon ng ordinansa na  pagbabawal sa mga  provincial at city bus na walang existing terminal na pumasok sa  lungsod.

Personal na pinanga­siwaan ni Manila Vice Mayor Isko Moreno ang pagharang sa may 40 bus na galing Fairview at pinaikot sa Welcome Rotonda at dito ay umarkila  naman  ng mga pampasaherong jeep  ang city government na sumalo sa mga pasahero  na papasok at magtatrabaho sa Maynila.

Sinabi ni Moreno na alam ng mga operators ang kanilang gagawing pagpapatupad  ng  resolution No. 48 at lahat ng mga operators ay sumang-ayon  sa ordinansa kung kaya’t nakakapagtaka kung  bakit umaangal ang iilang mga drivers.

Binalaan ni Moreno ang mga bus drivers kung saan sinabi nito na  huhulihin na sila sa susunod na paglabag.

Layon ng resolution No. 48 ay maibsan ang  trapik gayundin ang paghuli sa mga kolorum bus na nag-oope­rate sa Maynila at mabigyan ng disiplina ang mga bus drivers gayundin ang  mga commuters.

Layon din aniya ng  city government na  ipatupad ang  proyektong ‘green transportation’ kung saan papasada ang electic bus sa loob lamang  ng Maynila.

Magsisilbing tagasalo ang electric bus sa mga pasahero na manggagaling sa South, North at Eastern part ng Metro Manila na may rutang Vito Cruz- Lawton; Lawton-Anda Circle-Vito Cruz at Lawton Intramuros-Vito Cruz.