2 banyagang estudyante tiklo sa PDEA

MANILA, Philippines - Nadakip ng mga ahente ng Philippine Drug Enforcement Agency (PDEA) ang tatlong katao kabilang ang dalawang banyagang estud­yante sa isang entrapment ope­ration sa Dasmariñas City, Cavite kamakailan.

Ang mga nahuling sus­pek ay kinilalang sina Vire Solomon, 19; Gibson Tari, 25, kapwa dayuhan at mga estudyante mula Republic of Vanuatu, isang isla na ma­tatagpuan sa South Pacific Ocean na pansamantalang nanunuluyan sa Barangay Langkaan, Dasmariñas City, Cavite at Eduardo Gocotano Jr., alias Kaloy, 28 ng  Block 29-B, Lot 5, CHRV ng nasabing lugar.

Batay sa ulat, noong Huwebes ng madaling-araw sa kahabaan ng Congressional Avenue, Pasong Lawin, Dasmariñas City, Cavite nang isagawa ang entrapment ope­ration at dito ay nakumpiska sa mga suspek ang isang brick  na tuyong dahon ng marijuana, 12 plastic sachets na may lamang marijuana, isang botelya ng hinihina­lang Psilocybine, kilala rin sa tawag na  Magic Mushroom, isang mapa­nganib na droga at isang smoking pipe.