Jobless na mister nagbigti

MANILA, Philippines -Dahil sa hindi maka­yang depresyon sa buhay minabuti ng isang jobless na mister ang magpakamatay sa pamamagitan ng pagbigti kahapon ng madaling-araw sa ka­ni­lang bahay sa Que­zon City.

Natagpuan ang bikti­ma na si John Rafael Cabello, 26, ng kanyang kinakasama na nakabigti sa kisame at walang nang buhay ganap na alas-4:30 ng madaling-araw.

Sa salaysay ng kina­ka­samang si Michelle Santiago, madalas uma­nong nakakaranas ng depresyon ang biktima, dahil dati umano itong gumagamit ng iligal na droga o shabu.

Bago umano nangyari ang insidente sinundo pa ng biktima si Michelle sa tinuluyang bahay nito para muli silang magsama.

Sumama naman si Michelle hanggang pagsapit sa kanilang bahay ay nagpasya silang matulog.

Makalipas ang alas-4:30 ng madaling-araw, nang magising si Michelle para gumamit ng banyo ay nagulat na lang siya nang matagpuan ang biktima na nakabitin sa kisame.