Ex-mayor, accountant kulong ng 10 taon

MANILA, Philippines - Sampung taon na pagkakulong ang hinatol ng Sandiganbayan sa isang dating mayor at accountant ng Caibiran, Biliran matapos mapatunayang may probable cause para maidiin ang mga ito sa kasong graft kaugnay ng  maanomalyang pagsusuplay ng steel pipe connectors noong 1998.

Sa  23-pahinang desisyon, ang mga pinarusahan ng Sandiganbayan’s First Division ay si dating  OIC mayor Melchor G. Maderazo at acting municipal accountant Dionesio R. Veruen Jr. matapos makitang guilty sa paglabag sa Section 3(e) ng Republic Act (RA) No. 3019 (Anti-Graft and Corrupt Practices Act) matapos umanong magsabwatan para makuha ang naturang pondo.

Inatasan din ng graft court sina  Maderazo at Veruen na ibalik sa bayan ng Caibiran, Biliran  ang halagang P160,000  na nawawala dahilan sa hindi naman nai-deliver ang 400 piraso ng steel pipe connectors na dapat sana ay naipambili dito.

Sa record, noong Enero 28, 1998 ay nagpasa ng resolusyon ang  Sangguniang Bayan (SB) ng Caibiran para pumasok si  Maderazo  sa isang  negotiated contract kay Artemio Vermug, proprietor ng Vermug Welding Shop para sa pagbili ng  400 piraso ng steel pipe connectors na pinondohan ng P160,000 para  sa pagpapabuti sa sistema ng patubig sa naturang bayan. Subalit, dumaan ang araw ay sinasabing hindi na kailangan ang mga steel pipe connectors  kayat hindi na naipambayad ang naturang pondo gayung na-irelease na ng konseho ang P160,000 para sa proyekto. 

Bukod sa kulong, hindi rin pinapayagan ng graft court na makabalik sa mga tanggapan ng gobyerno ang mga akusado.