Graduating student dedo sa ambulansiya

MANILA, Philippines - Hindi na makakasama sa martsa sa darating na graduation ang isang 19-anyos na 4th year high school matapos itong masawi nang masalpok ang minamanehong tricycle ng isang ambulansiya kahapon ng madaling-araw sa crossing ng Pulupundan, Brgy. Mabini, Valladolid, Negros Occidental.

Ang nasawi ay nakilalang si Michael Ruiz, na nagtamo ng malaking sugat sa ulo.

Ang mga nasuga­tan ay kinilalang sina John Dexter Traigo; Jessie Rey de Pena,18; Charlene Medalla, 19 at Liezel Villa-Corteza, 16.

Batay sa ulat, dakong alas-3:35 ng madaling-araw ay pauwi na ang biktima at minamaneho nito ang tricycle at pagdating sa crossing ay  hindi nito namalayan ang paparating na ambulansiya.

Tuluy-tuloy na sinalpok ng ambulansya na pag-aari ng local na pamahalaan ng bayan ng Ilog, Negros Occidental na maghahatid sana ng pasyente sa Bacolod City.

Inamin ng driver ng ambulansiya na si Efren Millan, 59 na hindi nito pinatunog ang sirena kaya’t hindi siya namalayan ng driver na humantong sa malagim na sakuna.