Nakapasok na ng bahay sinundan pa rin… mag-asawang trader itinumba

MANILA, Philippines - Sa ika-apat na araw sa pagpapatupad ng gun ban dahil sa nalalapit ng midterm election, isang mag-asawang negosyante ang pinagba­baril ng mga hindi pa kila­lang suspek kamakalawa ng gabi sa Sagay City, Negros Occidental.

Ang mag-asawa na na­sawi noon din sa loob ng kanilang bahay ay nakilalang sina Amelita, 45 at Ronilo Pacheo, 44; dahil sa tinamong mga tama ng bala ng cal 9 MM pistol.

Nabatid na ang mag-asawa ay nagmamay-ari ng isang sikat na video­ke at sari-sari store sa ka­ni­lang lugar.

Batay sa imbestigas­yon ng pulisya, dakong alas-8:00 ng gabi ay nasa labas ng kanilang bahay sa Brgy. Bato ang mag-asawa nang bigla na lamang sumulpot ang mga armadong salarin at pagbabarilin ang mga ito.

Nakita ng mga kapitbahay na kahit may tama na ang mag-asawa ay na­gawa pang makatakbo sa loob ng kanilang bahay, subalit sinundan sila ng mga suspek at tuluyang tinapos.

Narekober naman ng mga nagrespondeng otoridad ang mga basyo ng bala ng cal 9 MM pistol.

Pinaniniwalaan namang isang lumang alitan ang motibo ng pamamaslang sa mag-asawa na nangyari sa kasagsagan ng pagpapatupad sa election gun ban ng Comelec.