Senado rerebyuhin ang mga ordinansa at panukala sa paputok

MANILA, Philippines - Sa pagbabalik ng ses­yon ay tiniyak kahapon ni Senator Gregorio Honasan, chairman ng Senate Committee on Public Order and Dangerous Drugs na ire-review ng kaniyang komite ang lahat ng mga ordinansa ng mga lokal na gobyerno at mga panukalang batas na naglalayong i-ban na ang paggamit ng paputok sa bansa.

Kabilang sa titingnan ng komite ni Honasan ang panukala nina Senators Miriam Defensor-Santiago at Manny Villar na i-re­gu­late ang pag­gamit ng pa­putok sa bansa upang maiwasan ang napakara­ming nadi-disgrasya tuwing sumasapit ang Bagong Taon.

Inihalimbawa ni Ho­na­san ang mga pro­binsiya ng Davao at Ormoc kung saan ipinagba­bawal na ang paggamit ng paputok.

“Balak (ko) talaga mag conduct ng hearing to see if it will require a national law.. like Davao and Ormoc,”ani Honasan.

Titingnan ng komite ni Honasan kung kina­kaila­ngan pang magpasa ng isang national law para ipa­tupad sa buong bansa.

 Matatandaan na sa ka­bila ng kampanya ng Department of Health laban sa paggamit ng pa­putok marami pa rin ang mga na­ging biktima sa pag­pasok ng 2013.