Shootout sa checkpoint: Holdaper PATAY, pulis sugatan
MANILA, Philippines - Isang pinaghihinalaang notoryus na miyembro ng robbery/holdup gang ang nasawi habang isang pulis ang nasugatan sa naganap na shootout sa checkpoint sa Imus City, Cavite kahapon ng madaling-araw.
Wala pang pagkakakilanlan ang napatay na suspek na armado ng kalibre 38 baril. Habang ang nasugatang pulis ay kinilalang si PO2 Gerry Baniasia, nagtamo ng sugat sa kanang hita at isinugod sa Our Lady of Pillar Hospital sa lungsod.
Batay sa ulat, bandang ala-1:45 ng madaling-araw nang masabat ng mga elemento ng Imus City Police ang apat na motorcycle riding in tandem sa checkpoint sa Brgy. Buhay na Tubig ng lungsod.
Dito ay agad na pinaputukan ng mga suspek ang mga pulis na ikinasugat ni Baniasia.
Kaya naman ay gumanti ng putok ang mga pulis at sa kasagsagan ng shootout ay tumimbuwang ang isang suspek na inabandona ng mga nagsitakas nitong kasamahan at narekober ang isang kulay itim na motorsiklo na gamit ng mga ito sa operasyon.
Nabatid na ang grupo ng mga suspek ang hinihinalang nasa likod sa serye ng robbery/holdup sa Cavite.
- Latest
