Semis seselyuhan ng ZUS Coffee

MANILA, Philippines — Ang pagkumpleto sa pagwalis sa Petro Gazz ang misyon ng ZUS Coffee sa Game Two ng kanilang quarterfinals series sa 2024-25 Premier Volleyball League (PVL) All-Filipino Conference.

Lalabanan ng Thunderbelles ang Gazz Angels ngayong alas-4 ng hapon kasunod ang bakbakan ng nagdedepensang Creamline Cool Smashers at Chery Tiggo Crossovers sa alas-6:30 ng gabi sa Ynares Center sa Antipolo City.

Umiskor ang ZUS Coffee ng 25-21, 25-23, 27-25 panalo sa Game One para sa 1-0 lead sa kanilang best-of-three duel ng Petro Gazz.

Sina veteran Jovelyn Gonzaga, Chai Troncoso, Thea Gagate, Mich Gamit, Chinnie Arroyo at Cloanne Mondoñedo ang muling babandera sa Thunderbelles katapat sina Fil-Am Brooke Van Sickle, Myla Pablo, Aiza Pontillas, MJ Phillips, Djanel Cheng at Remy Palma ng Gazz Angels.

“There is no room for complacency,” ani Gonzaga sa ZUS Coffee. “Pagtatrabahuhan namin -- kung anuman ‘yung ipinakita namin, dodoblehin namin at kailangan talaga makinig kami sa coaching staff.”

Determinado naman si Pablo na maitabla ang Petro Gazz sa serye para makahirit ng deciding Game Three.

“I think sa Game Two talaga, kailangan makauna kami. Hindi puwedeng kami ‘yung naghahabol,” wika ni Pablo.

Gusto ring walisin ng Creamline ang Chery Tiggo papasok sa sermifinals na isang round-robin kung saan ang top two teams ang sasampa sa best-of-three championship series.

Pinadapa ng Cool Smashers ang Crossovers sa Game One, 25-10, 27-25, 25-21, tampok ang 16 points, 13 excellent digs at siyam na excellent receptions ni team captain Alyssa Valdez.

Pasok na sa semis ang Choco Mucho at Akari matapos ang two-game sweep sa PLDT at Galeries Tower, ayon sa pagkakasunod.

Tinalo ng Flying Titans ang High Speed Hitters sa Game One, 20-25, 19-25, 25-15, 25-20, 18-16, at Game Two, 25-15, 12-25, 25-23, 21-25, 15-13.

Pinadapa ng Chargers ang Highrisers sa Game One, 21-25, 25-19, 20-25, 25-16, 15-11, at Game Two, 19-25, 25-20, 16-25, 25-20, 15-12.