Lakers sinuwag ng Bucks

LOS ANGELES — Nagkadena si Giannis Antetokounmpo ng 28 points, 7 rebounds at 4 assists para pangunahan ang Milwaukee Bucks sa 118-89 pagsuwag sa Lakers.

Nag-ambag si Gary Trent Jr. ng 23 points habang may 20 markers si Kyle Kuzma sa pagwalis ng Milwaukee (39-30) sa kanilang season series ng Los Angeles (43-26).

Hindi naglaro para sa Bucks si Damian Lillard dahil sa kanyang calf injury.

Wala sa lineup ng Lakers sina injured starters LeBron James, Luka Doncic, Austin Reaves, Rui Hachimura at key reserves Dorian Finney-Smith at Jarred Vanderbilt.

Umiskor si Bronny James ng 17 points para sa una niyang double figures sa 22 NBA games sa Los Angeles na nagtapos ang nine-game home winning streak.

Mula sa 57-46 halftime lead ay pinalobo ng Milwaukee ang kanilang kalamangan sa 35 points sa second half patungo sa panalo.

Sa San Francisco, humakot si Jimmy Butler ng triple-double na 18 points, 11 rebounds at 12 assists sa 117-114 paglusot ng Golden State Warriors (41-29) sa Toronto Raptors (24-46).

Sa Sacramento, kumamada si Coby White ng 35 points sa 128-116 pagpapatumba ng Chicago Bulls (30-40) sa Kings (35-34).

Sa Charlotte, umiskor si LaMelo Ball ng 25 points sa 115-98 panalo ng Hornets (18-51) sa New York Knicks (43-26).