Magnolia dumiga ng playoff sa no. 8 spot

MANILA, Philippines — Nakahabol ang Magno­lia para sa knockout sa huling tiket sa quarterfi­nals matapos kaldagin ang Meralco, 129-92, sa pag­ta­t­apos ng elimination round ng 2024-2025 PBA Commissioner’s Cup kahapon sa PhilSports Arena sa Pasig City.

Limang players ang umiskor ng twin digits para sa balanseng atake ng Hoshots na tinapos ang kampanya sa 6-6 kartada sakay ng three-game winning streak.

Nakatabla ng Magnolia ang NLEX para sa No. 8 seed na maaari ring katampukan ng Rain or Shine (6-5) kung matatalo kontra sa TNT Tropang Giga (8-3) kagabi.

Aangat sa No. 7 ang NLEX kung matatalo ang Rain or Shine na magbibi­gay-daan sa knockout duel nito kontra sa Magnolia.

Subalit ang pinakama­ha­laga ay nanatiling buhay ang pag-asa ng Hotshots sa pangunguna ni import Ricardo Ratliffe na humakot ng 31 points, 19 rebounds, 4 assists at 2 steals.

Umayuda si Zavier Lucero ng 22 points, habang may tig-18 markers sina Ian Sangalang at Mark Barroca kasunod ang 14 points ni Calvin Abueva para sa mga bataan ni coach Chito Victolero.

Sumadsad sa 3-6 kartada ang Magnolia bago isa-isahin ang Phoenix, 110-104, Eastern, 107-78, at Meralco na nagparada ng All-Filipino line-up.

Umiinda ng back injury si Bolts import Akil Mit­chell na hindi rin naglaro kon­tra sa Ginebra, kaya hin­di na muna pinilit ng Me­ralco para ipahinga sa playoffs kung saan sigurado na sila para sa best-of-three series sa No. 5 seed.

Sinamantala ito ng Hot­shots nang kumaripas ka­agad sa 35-19 ratsada sa first quarter matapos ang and-one ni Abueva ­tungo sa kumbinsidong 37-point victory.

Umiskor ng 23 points si Raymond Almazan at may 11 markers si CJ Cansino para sa Meralco.

Hawak ang 9-3 kartada, kasado na ang NorthPort sa No. 1 para sa isang ‘twice-to-beat’ advantage, habang gayundin ang mithiin ng TNT na kung matatalo na­man sa RoS ay makaka­tabla ang Converge at Gi­nebra sa 8-4 kartada para malaman ang final ran­kings.