NLEX tumiyak ng playoff

MANILA, Philippines — Umiskor ng higanteng 94-76 panalo ang NLEX kontra sa Eastern para sumeguro ng playoff sa 2024-2025 PBA Commissioner’s Cup kahapon sa Smart-Araneta Coliseum.

Ito na ang ikatlong sunod na panalo ng Road Warriors upang tapusin ang kampanya sa 6-6 kartada at masolo ang No. 8 seed sa ngayon.

Hawak ng NLEX ang kapalaran nito at kailangan lang na matalo ang Magnolia (5-6) sa huling laban nito kontra sa Meralco upang masikwat ang huling puwesto sa quarterfinals.

Kung sakali namang manalo ang Hotshots at matalo ang Rain or Shine sa huling laban nila kontra sa Talk ‘N Text ay pwedeng magkaroon ng triple tie sa 6-6 kartada kung saan posibleng makaangat sa No. 7 seed ang NLEX depende sa quotient system.

Kung hindi naman papalarin sa No. 7 seed ay buhay pa rin ang NLEX sa knockout match kontra sa Magnolia o sa Rain or Shine subalit higit dito dahil sa panalo ng Road Warriors ay nasibak na sa kontensyon ang reigning champion na San Miguel Beer na nagtapos sa 5-7 kartada.

Nagawa ito ng NLEX sa likod ni Best Import race leader Michael Griffin-Watkins na kumamada ng 41 puntos, 14 rebounds, 2 assists at 2 tapal.

Nag-ambag din ng 21 puntos si Robert Bolick sahog pa ang 5 rebounds, 8 assists at 2 steals.

Laglag sa 7-4 kartada ang Eastern upang mapaka­walan ang tsansa sa twice-to-beat at kailangan pang maghintay sa resulta ng huling 2 laban upang matukoy ang final ranking.