UST bangas ang lineup para sa UAAP Season 87

MANILA, Philippines — Nalagasan agad ang lineup ng University of Santo Tomas para sa UAAP Season 87 women’s volleyball tournament na nakatakdang umarangkada sa susunod na buwan.

Nawala sa lineup ng Golden Tigresses si outside hitter Jonna Perdido matapos magtamo ng anterior cruciate ligament (ACL) tear sa kanyang kaliwang tuhod.

Natamo ni Perdido ang naturang injury sa laban ng Golden Tigresses kontra sa Far Eastern University sa bronze-medal match ng Shakey’s Super League noong Nobyembre.

Ngunit nadiskubre ang lala ng injury nito kamakailan lamang dahilan para alisin na muna ito sa lineup ng Golden Tigresses para sa nalalapit na pagbubukas ng volleyball season sa susunod na buwan.

Mangangailangan si Perdido ng anim na buwan na rehabilitasyon upang tuluyang gumaling ang injury nito.

Umaasa ang kampo ng Golden Tigresses sa mabilis na paggaling ni Perdido upang makasama itong muli sa susunod na season ng liga.

Malaking kawalan si Perdido para sa Golden Tigresses lalo pa’t isa ito sa inaasahan ng tropa sa scoring department.

Dahil dito, maiiwan ang pasanin kay outside hitter Angeline Poyos na siyang scoring machine ng Golden Tigresses.