Choco Mucho sinilat ang ZUS Coffee

MANILA, Philippines — Limang sets ang kina­ilangan ng Choco Mucho upang pabagsakin ang ZUS Coffee, 20-25, 20-25, 25-22, 25-22, 15-9  sa 2024-2025 Premier Volleyball League (PVL) All-Filipino Conference na nilaro sa Philsports Arena, kagabi.

Humugot ng puwersa ang Flying Titans kina Sisi Rondina, Dindin Manabat at Deanna Wong upang tulungan ang koponan na umahon mula sa dalawang sets na pagkakalubog.

Matapos sumadsad sa unang dalawang frames, nagsanib puwersa sina Rondina, Wong Manabat kasama si Isa Molde upang ratratin ang tatlong natitirang sets at ilista ang pa­ngalawang sunod na five sets win.

Inukit ni Rondina ang 25 points mula sa 24 kills at isang service ace habang ang nahirang na Best Player of the Game na si Wong ay bumakas ng pitong puntos kasama ang 10 excellent sets para sa Flying Titans na tangan ang 4-3 karta at puwestuhan ang solo sixth place sa team standings.

Nagtala si Manabat ng 19 points, 13 puntos ang kinana ni Molde habang 11 ang inambag ni Lorraine Pecana.

Pinamunuan ni Glaudine Troncoso ang  ZUS sa nilistang 17  points.

Samantala, nagwagi ang Farm Fresh Foxies sa panalo kontra Nxled Chameleons, 25-22, 26-24, 25-21, sa unang laro.

Humarbat ang pambato ng Farm Fresh na si Jolina Dela Cruz ng kabuuang 20 puntos mula sa 18 atake at dalawang service aces sa kanyang unang paglalaro matapos ang mahigit na isang taon sa pagpapagaling mula sa ACL injury.