Watkins No. 1 sa karera sa Best Import award

MANILA, Philippines —  Nangunguna si Mike Watkins ng NLEX Road Warirors sa karera para sa Best Import award sa ginaganap na PBA Season 49 Commissioner’s Cup.

Nagrehistro si Watkins ng 54.9 statistical points mula sa kanyang mga solidong laro para sa Road Warriors.

Hawak ni Watkins ang averages na 25.4 points, 24.1 rebounds at 1.9 assists para okupahan ang unang puwesto.

Naungusan ni Watkins ang dating PBA Best Import awardees na sina Justin Brownlee ng Barangay Ginebra at Rondae Hollis-Jefferson ng Talk ’N Text.

Nasa segunda si Kadeem Jack ng NorthPort na may kabuuang 50.7 SPs mula sa averages na 30.3 points, 11.9 rebounds, 1.4 assists, 1.5 steals at 1.7 blocks.

Malaking tulong si Jack para hawakan ng Batang Pier ang liderato tangan ang 7-1 rekord.

Nasa ikatlong posisyon lamang si Brownlee — ang three-time Best Import awardee — na may 50.2 SPs.

Nagtala ang Gilas Pilipinas naturalized player ng averages na 28.0 points, 10.0 rebounds, 4.5 assists, 1.2 steals at 1.2 blocks para sa Gin Kings.

Ikaapat naman si Donovan Smith ng Phoenix na may 49.5 SPs at ikalima si Dean Thompson ng Rain or Shine na may 48.3 SPs.