Herro, Jaquez isinalba ang Heat kontra sa Jazz
SALT LAKE CITY — Nagsalpak si Tyler Herro ng 23 points at may 20 markers si Jaime Jaquez kasama ang lima sa huling1:03 minuto ng laro para gabayan ang Miami Heat sa 97-92 pagsunog sa Utah Jazz.
Humakot si star center Bam Adebayo ng 15 points, 7 rebounds, 3 assists, 3 steals at 2 blocks.
Naglaro ang Heat (19-17) na wala si Kevin Love (personal reasons), habang pinatawan si Jimmy Butler ng isang seven-game suspension.
Umiskor si Collin Sexton at Lauri Markkanen ng tig-23 para sa pang-siyam na sunod na home loss ng Jazz (9-27).
Wala sa lineup ng Utah sina injured players Jordan Clarkson (foot), John Collins (hip), Keyonte George (heel) at Brice Sensabaugh (illness) na tumipa ng 61 points sa kanilang huling dalawang laro kontra sa Miami at Orlando Magic.
Matapos makadikit ang Jazz sa 88-90 ay kumonekta si Jaquez ng 3-pointer kasunod ang dalawang free throws ni Herro sa dulo ng fourth quarter para sa 95-88 abante ng Heat.
Sa Cleveland, nagpaputok si Darius Garland ng season-high 40 points, habang nagtala si Jarrett Allen ng 18 points at 15 rebounds sa 132-126 pagdaig ng NBA-leading Cavaliers (33-4) sa Toronto Raptors (8-30).
Sa Phoenix, kumamada si Bradley Beal ng 25 points, habang may 23 markers si Kevin Durant sa 123-115 paggupo ng Suns (17-19) sa Atlanta Hawks (19-19).
Sa Memphis, humakot si Alperen Sengun ng 32 points at 14 rebounds sa 119-115 pagpapasabog ng Houston Rockets (25-12) sa Grizzlies (24-14).
- Latest
