San Miguel balik sa winning form

MANILA, Philippines — Matagumpay ang na­ging pagbabalik ni Leo Austria bilang head coach ng San Miguel matapos ang 106-88 panalo kontra sa Terrafirma sa 2024 PBA Commissioner’s Cup kahapon sa Ninoy Aquino Sta­dium sa Maynila.

Ibinalik ng SMB bilang chief tactician si Austria kapalit ni Jorge Gallent at hindi niya bi­nigo ang Beermen sa ma­ugong na comeback upang magaba­yan sila sa tagumpay matapos ang dalawang sunod na ka­bi­gu­an.

Head coach ng SMB si Austria tampok ang siyam na titulo simula noong 2014 bago maitalagang team consultant noong na­karaang taon.

Bumida sa pagbabalik ni Austria si import Torren Lorenzo Jones na may 24 points, 13 rebounds, 3 assists at 1 block para ma­kabalik sa winning column ang SMB sa 2-2 matapos tumaob kontra sa NLEX, 104-99, at Rain or Shine, 107-93.

Nakatulong niya si 8-time PBA MVP June Mar Fajardo na may 21 points, 19 rebounds at 7 assists.

Umalalay sina CJ Pe­rez, Juami Tiongson at Don Trollano na may 16, 12 at 10 points, ayon sa pag­kakasunod.

Kontra sa Dyip, hindi agad nakaratsada ang Beermen sa first half nang lumamang lang ng 47-39 bago tuluyang nilasing ang karibal sa second half kung saan sila umabante ng hanggang 21 puntos.

Ito ang unang paghaha­rap ng dalawang koponan matapos ang trade tampok sina Tiongson at Andreas Ca­hi­lig pa-SMB kapalit nina Terrence Romeo at Vic Ma­nuel.

Laglag sa 0-5 ang Dyip sa kabila ng hinakot na 18 points at 18 rebounds ni Brandon Walton-Edwards at 14 markers ni Mark No­noy.