NLEX ‘di nakaporma sa NorthPort
MANILA, Philippines — Hindi pinaporma ng NorthPort ang NLEX, 114-87, para sa magarbong opener ng kampanya nito sa 2024 PBA Commissioner’s Cup kahapon sa Ninoy Aquino Stadium sa Maynila.
Muling pinatunayan ni Arvin Tolentino na ang kanyang Mythical Team citation sa paglista ng 29 puntos sahog pa ang 2 rebounds, 2 assists at 1 tapal upang trangkuhan ang atake ng Batang Pier.
Solido rin ang PBA debut ng import na si Kadeem Jack na humakot ng 25 puntos, 2 rebounds, 2 assists at 1 steal habang may 14 puntos din si Allyn Bulanadi.
Nag-ambag ng 12 puntos si Joshua Munzon habang may 8 at 7 puntos sina Fran Yu at Wil Navarro, ayon sa pagkakasunod.
Maalat ang naging simula ng NorthPort sa 21-29 bago baliktarin ang kwento sa second quarter, 35-12, upang makapagtayo ng 56-41 abante sa halftime.
Hindi na lumingon pa ang Batang Pier hanggang sa lumamang ng 41 puntos, 114-83, tungo sa kumbinsidong tagumpay.
Nauwi sa wala ang halimaw na 29 puntos, 19 rebounds, 4 assists, 1 steal at 2 tapal ni import Michael Griffin-Watkings para sa Road Warriors.
Maging ang 11 puntos ni Richie Rodger at tig-10 puntos nina Javee Mocon at Anthony Semerad ay kinapos pa rin para sa NLEX.
- Latest
