MANILA, Philippines — Iniskor ni rookie Jonathan Daileg ang lahat ng kanyang 11 points sa fourth quarter para akayin ang Lyceum of the Philippines University sa 74-65 panalo sa Emilio Aguinaldo College sa second round ng NCAA Season 100 men’s basketball kahapon sa FilOil EcoOil Centre sa San Juan City.
Tinuhog ng Pirates ang ikatlong sunod na panalo para sa 9-8 record at solohin ang fourth place, habang nalaglag ang Generals sa 8-9 marka.
Ibinulsa ng Lyceum ang playoff spot para sa huling tiket sa Final Four na kinabibilangan ng College of St. Benilde, (13-3) Mapua University (13-3) at nagdedepensang San Beda University (10-6).
Hawak na ng Blazers at Cardinals ang dalawang ‘twice-to-beat’ incentive.
“I always reminded them that this game is very important to us. Kung importante din sa EAC mas importante sa amin kasi our goal is going to the Final Four,” ani coach Gilbert Malabanan.
Sa ikalawang laro, niresbakan ng sibak nang University of Perpetual Help System DALTA ang Jose Rizal University, 86-82.