Bocboc gagabay sa Foxies sa PVL AFC
MANILA, Philippines — Bukod kina Norman Miguel ng Chery Tiggo at Italian Ettore Guidetti ng Nxled ay gagawin din ni Benson Bocboc ang kanyang debut bilang interim coach ng Farm Fresh sa 2024-25 Premier Volleyball League (PVL) All-Filipino Conference.
Si Bocboc ang tinapik ng Foxies para saluhin ang naiwang trabaho ni Japanese coach Shota Sato na bumalik sa Japan matapos ang nakaraang PVL Invitational Conference.
Hinawakan na rin ni Bocboc ang F2 Logistics Cargo Movers noong 2022 PVL season.
Ang longtime La Salle Lady Spikers deputy coach ay nauna nang hinirang na bagong women’s volleyball coach ng University of the Philippines Lady Maroons.
Gagabayan ni Bocboc sa Farm Fresh sina Trisha Tubu, Louie Romero, Caitlin Viray at Jolina Dela Cruz at mga bagong hugot na sina Rachel Anne Daquis, libero Jheck Dionela at Fil-Am setter Alohi Robins-Hardy.
Sina Daquis, Dionela at Robins-Hardy ay dating magkakasama sa tropa ng Cignal HD.
Unang lalabanan ng Farm Fresh ang Cignal sa Nobyembre 16 sa Ynares Center sa Antipolo City.
Pormal na magbubukas ang PVL All-Filipino Conference sa Nobyembre 9 tampok ang salpukan ng 2023 finalist Choco Mucho at Petro Gazz sa alas:6:30 ng gabi matapos ang laban ng Akari at Galeries Tower sa alas-4 ng hapon sa Philsports Arena sa Pasig City.
- Latest
