Depensa magiging susi ng TNT sa finals

MANILA, Philippines — Kung depensa ang gi­na­mit ng nagdedepensang TNT Tropang Giga para sibakin ang Rain or Shine sa semifinals series ay ito rin ang kanilang gagawing sandata para sa PBA Finals.

Pinatalsik ng Tropang Giga ang Elasto Painters, 4-1, sa kanilang best-of-seven semis showdown para umabante sa kanilang ika-23 finals appearance target ang pang-10 korona sa Season 49 PBA Governors’ Cup.

“There’s no secret to our game. We really hang our hats to our ability to stop the other team,” wika ni coach Chot Reyes.

“When we make stops, we give ourselves a lot of opportunities and we need a lot of opportunities because we don’t shoot the ball particularly well,” dagdag ng nine-time PBA champion mentor.

Lalabanan ng TNT sa best-of-seven championship series ang mananalo sa semis duel ng Barangay Ginebra at San Miguel.

Matinding paghahanda ang gagawin ng Tropang Giga sinuman sa Gin Kings at Beermen ang kanilang makakatagpo sa finals ng season-opening confe­rence.

“We have to go back and make sure that we’re able to take advantage. There’s always two sides to this. You can dull or lose your edge, or you can use it as a good recovery and keep sharp,” wika ng 61-anyos na si Reyes.

Hindi naman natatapos sa semifinals ang kanilang misyon para sa back-to-back championship, ayon kay reigning Best Import Rondae Hollis-Jefferson.

“We got a win and we’re going to the finals but that’s not the end for us, we want to be champions at the end of the day. So we know we got to do, take this rest and lock in, see who wins the other series and start that process,” sabi ni RHJ.

Sa 113-95 pagsibak ng TNT sa Rain or Shine sa Game Five noong Biyernes ay humakot si Hollis-Jefferson ng 36 points, 11 rebounds, 9 assists at 6 steals.

Ang mga numerong ito ang kailangang iposte ng dating NBA player sa PBA Finals para sa pagdedepensa sa korona ng Tropang Giga.