Philippine BEST magpapasiklab sa Tokyo
MANILA, Philippines — Magtatangkang humakot ng gintong medalya ang 7-man swimming team sa 2024 Buccaneer Invitational Swimming Championships na gaganapin sa Oktubre 26 hanggang 27 sa St. Mary’s International School swimming pool sa Tokyo, Japan.
Babanderahan ng Mojdeh brothers na sina Mikhael Jasper Mikee at Behrouz Mohammad Madi ang kampanya ng Behrouz Elite Swimming Team (BEST) sa naturang two-day meet.
Parehong anim na events ang lalahukan nina Mikee at Madi.
Unang sasalang si Mikee na hahataw sa 100m freestyle, 50m butterfly at 100m backstroke sa unang araw ng kumpetisyon sa boys’ 9-year class.
Masisilayan rin ito sa aksyon sa 50m backstroke, 100m butterfly at 100m Individual Medley.
Sa kabilang banda, magtatangkang humirit ng gintong medalya si Madi sa 400m Individual Medley, 100m butterfly, 100m breaststroke, 200m breaststroke, 200m butterfly at 200m IM sa boys’ 13-year division.
“We are sending them abroad to gain valuable experience from their foreign counterparts. Talagang bahagi ito ng programa namin para sa mga batang swimmers para mas lumalim ang experience nila at matuto,” ani BEST team manager Joan Mojdeh.
Maliban sa Mojdeh brothers, aarangkada rin sina Kristian Yugo Canaba (boys’ 14-year), Athena Custodio (girls’ 12-year), Juancho Jamon (boys’ 8-year), Clara Maligat (girls’ 13-year) at Therese Annika Quinto (girls’ 13-year).
- Latest
