Meralco lider na sa Group A
MANILA, Philippines — Ayaw paawat ng Meralco matapos tambakan ang Converge, 116-88, para masikwat ang solo liderato sa Group A ng 2024 PBA Governors’ Cup kahapon sa Smart-Araneta Coliseum.
Tumabo ng 27 puntos, 14 rebounds at 6 assists si 3-time Best Import Allen Durham upang trangkuhan sa ikatlong sunod na panalo at 4-1 kartada ang Bolts sa Group A.
Nagdagdag ng 24 si Chris Banchero, may 16 si Anjo Caram kabilang na ang 11 sa bulusok nila sa third quarter.
May mga iniindang injuries sina Cliff Hodge, Raymond Almazan, Allein Maliksi at Norbert Torres subalit halos wala lang para sa mga bataan ni coach Luigi Trillo na determinadong sundan ang kanilang kampeonato sa Philippine Cup noong nakaraang season.
“Kailangan, tulung-tulong lang kami. You gotta give credits to those who have been stepping up. We’re glad that they’re up to the task and they showed that in this game,” ani Trillo.
Sa katunayan ay semplang ang arangkada ng Bolts nang maiwan agad sa 8-23 sa first quarter pero hindi nagpatinag hanggang sa unti-unting ungusan ang Converge.
Matapos maagaw ang manibela sa 53-50 sa halftime, pumutok na ang mga tore ng Bolts sa pangunguna ni Caram na siyang gumiya sa 17-8 finishing quarter kick nila upang makapagtayo ng 85-70 abante na hindi na nila binitiwan pa.
- Latest
